ياماشي ع رجليك مابتعرف شو مقدر عليك !!

بعد التحية والسلام على أبناء شعبنا الكرام , فإنني أقول : لقد أصبحنا نعيش في بلد خير مايقال عنه بأنه أصبح “الداخل فيه مفقود والخارج منه مولد” !!!…
لماذا يا أخوتي !!? … هذا مانعرفه كعادتنا أنا وأنتم , ونعلم جيدا” كيف صارت الأمور ووصلت إلى هذا الحد … قد يكون جهل !! تآمر !! تخلف !! طمع وشجع !! عقليات مريضة !! أعداء كثر !! تعددت الأسباب والواقع واحد , حياة الشعب توصف “بالميت سريريا” … معظم الوصفات لم تشفي جراحنا , لأننا ببساطة مازلنا نجهل أو نخاف مجابهة الواقع , نخاف كلمة الحق .. نقول الباطل أو ننافق , الأمر كله بهدف “نمشي الحيط الحيط ونقول ياربي السترة” … مو المهم اذا انسترنا أو انفضحنا بس هاد اللي صار !!! … بعض الشغلات اللي عبتصير … الشب لما بيطلع من بيته ليشتري شي شغلة أو يعمل عمل معين , بكون ماشي ع رجليه ومو مهم إن كانت منطقة ساخنة أو باردة أو معتدلة الحرارة , الوضع كله عند بعضه .. وبطرفة عين بطلع بطريقه كم واحد … مين وليش مابعرف … أول سؤال “هاد هويتك” والتاني شوفوا شو عليه , والتالت “خدووووه” , والرابع “أهله مالهم خبر بشي … طيب معقول بعد كل هالتطور يصير فينا متل مابقول المتل ” ياماشي ع رجليك مابتعرف شو مقدر عليك” … طيب أخدوه وبالتالي اختفى , ألا يحق لأهله يوصلهم خبر لو بمسج صغير أو عبر التوتير والوتس أب أو الفيس “أنو فلان أخدنا” يعني متوفر, طيب لوين رايح وليش !!! .. هدول بيقولوا “هاد مطلوب” وهدوليك بيقول “هاد مطلوب” مافي غير عند ربنا “مالو مطلوب” .. ياريت الرب يطلبنا ونخلص من هالعيشة “الخمس نجوم” أحسن الشي .. طيب اذا هالشخص مالو حق يعيش حياة كريمة فينا نسأل “الله ليش خلقنا” ? … اذا هالإنسان مالو حق يعيش ببلده مكان ماولدته أمه فينا نعرف وين بدو يعيش ? .. شخص طلع من بيته ليجيب أكل وشرب لعيلته , والتاني رايح ع شغله , والتالت بدو يجيب دوا لأمه والرابع عندو مصالح مواطنين بين إيديه , وفجأة بتوقف وبيأخدوا !! .. طيب شو ذنب الأم لتنتظر الدوا مايرجع اللي بدو يجبلها الدوا !! ليش لنخليها تصرخ وتبكي وتفكر بأنو بعد شوي رح يبعتولها ابنها مقطع موصل أو “الله بيعلم اذا بدو يرجع أو مايرجع” .. طيب والحل ??… لازم الشب يعيش برا البلد ليخلص من شغلة “أخدووه” .. إلا يتخبئ متل “الحريم” !!! .. طيب بدي قول “ماأخدووه” لا هدول ولا هدوليك … بكون الواحد ماشي ع رجليه وفجأة “رصاصة أو قذيفة” بصير اسمه “الله يرحمه” !! والله .. وكأنه الشغلة مو مكلفة شي ?? وكأنه هالشخص مالو عيلة ولا إلو أم أو أب ولا إلو أخوة أو أولاد … معقول في حدا “مقطوع من شجرة” ? .. إلا الوضع عنا بسورية رح يخلينا كلنا “مقطوعين من الشجرة” !!! … بالختام بقول “الله يرحمنا ويحسن آخرتنا”