رسالة من جندي سوري محاصر إلى أمه بعيد الأم
ياأمي لاتخافي علي .. ابنك على قدر المسؤولية ، لاتقول ياأمي بأني مالي جاية .. أنا جاية بعد ما أطمن بأنه أمي سورية تعافت وتشافت من مرضها ..
كان بودي أبعتلك شي رسالة أو هدية .. بس يالله ياأمي أديش في حواجز على الطريق .. والمسلحين كتار كتير .. ياأمي لاتخافي على ابنك فأنا عايش كرمال عيونك وعيون أمي سورية .. قليله لبيي بأنك خلفت شب للبلد وقت الأزمة بتشوف رجولته ..
يا أمي اشتقت لحارتنا ومدرستي وولاد جيراني .. اشتقت لأروح مع بيي على صلاة الجمعة وأفطر معكن فول وحمص وفلافل .. ياأمي اشتقت لأسمع أجراس الكنائس يوم الأحد وأشوف طوني وميشيل وهنن رايحين ونتمشى معهم حد الكنيسة ..
اشتقت لصبايا حارتنا وهنن رايحين على الجامعة والعطر فواح من تيابهم .. اشتقت لعمي أبو معروف الدكنجي ولأكلاته الطيبة كنت ع طول أخد من عنده بسكويتة أم الخمس ليرات .. آه يا أمي حتى هي البسكويتة أم الخمس ليرات ماعدنا شفناها .. كلشي ياأمي صار غالي ومفقود .. يا أمي والله اشتقنا ..
سورية شو صار فيها مابعرف .. قالوا يا أمي السوريين أخوة .. يا أمي هيك كانوا أخوتي معي .. والله مابعرف إذا كنا أخوة عمنعمل ببعض هيك ، كيف لو كنا مالنا أخوة .. يا أمي حابب قبل ما أنسى أعايدك بعيد الأم لأنه لولاك ماكنت لأحمل السلاح وأدافع عن بلدي .. أنت ياأمي اللي خليتني أحب بلدي وأحبه متلك يا أمي .. أنت يا أمي اللي مانمت الليل بطفولتي وماكنتي تتركيني أروح ع المدرسة إلا بعد ماتمشطيلي شعري وتلبسيني الصدرية وتحطيلي بجنتايتي لفة زيت وزعتر .. آه يا أمي أديش حابب أشم ريحة لفة الزيت والزعتر من تحت ايديكي .. كنت أشم بكل عضة ريحة بلدي سوري .. ياأمي ، .. بالسنة الماضية كان رفيقي حدي وطلب مني أذكره بأن يحكي مع أمه بيوم عيد الأم مشان يعايد عليها .. آه يا أمي لو تعرفي شو صار ..قبل بيوم من عيد الأم أجت سيارة مفخخة وخلت روحه ترتقي لرب السموات والأرض وهو عبيلفظ أنفاسه الأخيرة همس بإذني وقلي "أمي سورية اشتاقتلي ، سلملي على أمي وقله روح أبنك جاية مع انتصارات الجيش ومع كل عسكري بالجيش روح انبك جاية معه" ..
مضت سنة ياأمي ومابعرف كيف بدي أذكره بعيد الأم مشان يحكي مع الأم .. أكيد روح رفيقي رح تكون موجودة بكل دمعة من دمعات أمه .. ياأمي أنت غالية كتير على قلبي .. بس سامحني كمان سورية أمي وغالية على قلبي ..
أنا إذا بيوم ماشفتيني فعرفي بأنه جسدي أخدته أمي سورية ورح وصي روحي تبقى عندك متل ماوصى رفيقي روحه تبقى عنده أمه طيلة العمر .. ياأمي أنت ربيتني على حب الوطن فلاتبكي علي .. أنت وبيي ربيتوني على العز والكرامة وعلى التضحية من أجل بلدي .. بس يخبروكي رفقاتي بأني استشهدت بدي أسمع زلغيتك لعندي ، وقولي كل العالم بأنك "زفيتي ابنك عريس فدا هالبلد .. سورية غالية ومهر غالي" .. أوصيك ياأمي تصلي لأجل السلام في سورية وتعانقي أم طوني وميشيل وتسمعوني صوت أجراس الكنيسة .. يا أمي سلمي على كل عسكري عبيخدم وطنه وخبريهم عني .. وادعيلهم الله يحميهم وينصرهم .. ابنك المخلص
